Efnisorð
Tegund

Leita eftir efnisorðum

Sýnir 701–750 af 3013
Raða eftir:
06. des. 2023Heilbrigðisráðuneytið, Líf og heilsa

Eflir heilbrigðisþjónustu við þolendur kynbundins ofbeldis

Willum Þór Þórsson heilbrigðisráðherra hefur ákveðið að veita 90 milljónir króna til að fjölga stöðugildum sérfræðinga í heilbrigðisþjónustu sem aðstoða þolendur kynbundins ofbeldis. Ákvörðunin er hluti af innleiðingu verklags um allt land fyrir þolendur kynbundins ofbeldis (heimilisofbeldis og kynferðisofbeldis). Verklaginu er ætlað að samræma og bæta þjónustu heilbrigðiskerfisins við þennan hóp.

04. des. 2023Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 25/2023

Kærandi kærði ákvörðun Lyfjastofnunar um að synja beiðni um framleiðslu forskriftarlyfs. Byggði kærandi á því að synjunin væri ekki í samræmi við 38. gr. lyfjalaga. Í úrskurði ráðuneytisins var vísað til skilyrða um framleiðslu forskriftarlyfja, einkum að ómögulegt væri að fá til landsins sambærilegt lyf með markaðsleyfi. Þá væri óheimilt að veita leyfi ef sambærilegt lyf hefði markaðsleyfi hér á landi. Ráðuneytið taldi ljóst að sambærileg lyf væru seld hér á landi bæði, annars vegar undanþágulyf með markaðsleyfi í öðru ríki, sem og lyf með markaðsleyfi hér á landi. Hefði Lyfjastofnun þannig verið heimilt að synja beiðninni. Var hin kærða ákvörðun því staðfest.

23. nóv. 2023Heilbrigðisráðuneytið, Norrænt samstarf, Líf og heilsa

Svipmyndir frá heilbrigðisþingi

Hátt í 400 manns sóttu heilbrigðisþing sem fram fór í Hörpu í liðinni viku og fjölmargir fylgdust með þinginu í beinu streymi. Þetta er sjötta árið í röð sem heilbrigðisráðherra efnir til heilbrigðisþings þar sem áhersla er lögð á að fjalla um mikilvæg málefni sem varða heilbrigðisþjónustu við landsmenn í nútíð og framtíð. Að þessu sinni var sjónum beint að þeim tækifærum sem felast í nýtingu margvíslegra heilbrigðisgagna, stafrænnar þjónustu og gervigreindar.

21. nóv. 2023Heilbrigðisráðuneytið, Mennta- og barnamálaráðuneytið, Félags- og húsnæðismálaráðuneytið

Stuðningur við Bergið

Bergið headspace fær styrk frá stjórnvöldum til að veita ungu fólki stuðning og ráðgjöf með áherslu á snemmtæka íhlutun til að stuðla að aukinni virkni og vellíðan. Ásmundur Einar Daðason, mennta- og barnamálaráðherra, Willum Þór Þórsson heilbrigðisráðherra og Guðmundur Ingi Guðbrandsson, félags- og vinnumarkaðsráðherra, undirrituðu samning þess efnis við Bergið í dag.

13. nóv. 2023Heilbrigðisráðuneytið, Líf og heilsa

Glæsileg aðstaða á nýju hjúkrunarheimili í Stykkishólmi

Willum Þór Þórsson heilbrigðisráðherra fagnaði langþráðum áfanga með heimamönnum þegar nýja hjúkrunarheimilið Systraskjól í Stykkishólmi var vígt formlega fyrir skömmu. Heimilið er til húsa í gamla St. Franciskusspítalanum en allt húsnæðið var hannað og endurgert til að mæta sem best nútímakröfum um aðstæður íbúa á hjúkrunarheimilum. Systraskjól leysir af hólmi gamla hjúkrunarheimilið við Skólastíg og er aðstaða fyrir 18 íbúa á nýja heimilinu. Tvö hjúkrunarrými verða nýtt fyrir hvíldar- og endurhæfingarinnlagnir með áherslu á stuðning við einstaklinga sem geta með góðri endurhæfingu búið lengur í sjálfstæðri búsetu.

03. nóv. 2023Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 24/2023

Kærandi kærði málsmeðferðartíma embættis landlæknis í kvörtunarmáli til ráðuneytisins þar sem hann taldi meðferð málsins ekki í samræmi við ákvæði stjórnsýslulaga um málshraða. Í úrskurði ráðuneytisins var litið til þess að gagnaöflun hefði dregist hjá embætti landlæknis af ástæðum sem vörðuðu ekki embættið. Þótt nokkur tími hefði liðið frá því að gögn hefðu borist embættinu og þau kynnt kæranda lá fyrir að málið væri í eðlilegum farvegi. Taldi ráðuneytið því að meðferð málsins væri að svo stöddu í samræmi við ákvæði stjórnsýslulaga um málshraða stjórnsýslumála.

01. nóv. 2023Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 23/2023

Kærð var gjaldtaka heilsugæslunnar vegna afhendingar á sjúkraskrá. Krafði heilsugæslan kæranda gjald með vísan til ákvæða 14. gr. reglugerðar nr. 1551/2022, um greiðsluþátttöku sjúkratryggðra í kostnaði vegna heilbrigðisþjónustu. Kærandi byggði á því að lagastoð skorti fyrir innheimtu gjaldsins. Ráðuneytið vísaði til þess að samkvæmt lögum um sjúkraskrár ætti sjúklingur rétt á að fá sjúkraskrá afhenta í heild eða hluta. Í lögunum væri engin gjaldtökuheimild vegna vinnu við yfirferð á sjúkraskrá fyrir afhendingu. Með vísan til meginreglna um lagastoð fyrir gjaldtöku taldi ráðuneytið að kærandi yrði þannig ekki krafin um gjald vegna afhendingar á sjúkraskrá. Var gjaldtakan því ógilt og lagt fyrir heilsugæsluna að endurgreiða kæranda.

27. okt. 2023Heilbrigðisráðuneytið, Líf og heilsa, Norrænt samstarf

Spennandi dagskrá og öflugir fyrirlesarar á heilbrigðisþingi 14. nóvember

Heilbrigðisþing 2023 verður haldið í Hörpu þann 14 nóvember. Dagskráin er afar metnaðarfull og með norrænu og alþjóðlegu yfirbragði. Þingið fer fram á ensku og hefur yfirskriftina: „Data and Digitalization: Crafting the Future of Sustainable Healthcare.“ Á vef þingsins eru allar upplýsingar um dagskrána og fyrirlesarana og þar fer skráning þátttöku fram.

26. okt. 2023Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 22/2023

Kærð var gjaldtaka heilbrigðisstofnunar vegna afhendingar á sjúkraskrá. Krafði stofnunin kæranda gjald með vísan til ákvæða 14. gr. reglugerðar nr. 1551/2022, um greiðsluþátttöku sjúkratryggðra í kostnaði vegna heilbrigðisþjónustu. Kærandi byggði á því að lagastoð skorti fyrir innheimtu gjaldsins. Ráðuneytið vísaði til þess að samkvæmt lögum um sjúkraskrár ætti sjúklingur rétt á að fá sjúkraskrá afhenta í heild eða hluta. Í lögunum væri engin gjaldtökuheimild vegna vinnu við yfirferð á sjúkraskrá fyrir afhendingu. Með vísan til meginreglna um lagastoð fyrir gjaldtöku taldi ráðuneytið að kærandi yrði þannig ekki krafin um gjald vegna afhendingar á sjúkraskrá. Var gjaldtakan því ógilt og lagt fyrir stofnunina að endurgreiða kæranda.

25. okt. 2023Heilbrigðisráðuneytið, Líf og heilsa

Til umsagnar: Reglugerð um meðferðir til útlitsbreytinga án læknisfræðilegs tilgangs

Birt hafa verið til umsagnar og samráðs drög að reglugerð sem takmarka heimildir til að veita tilteknar meðferðir sem gerðar eru til að breyta útliti fólks í fegrunarskyni og án læknisfræðilegs tilgangs. Með áformuðum breytingum verður áskilið að einungis tilteknum löggiltum heilbrigðisstéttum og eftir atvikum sérfræðingum innan þeirra, verði heimilt að veita þær meðferðir sem um ræðir. Markmiðið er að tryggja öryggi sjúklinga og gæði þjónustunnar með hagsmuni sjúklinga að leiðarljósi.

25. okt. 2023Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 21/2023

Kærandi, sem er læknir, kærði ákvörðun embættis landlæknis um að áminna hann. Var áminninguna að rekja til álita embættis landlæknis í tveimur málum þar sem embættið hafði komist að niðurstöðu um mistök/vanrækslu við veitingu heilbrigðisþjónustu og vanrækslu á að færa sjúkraskrá. Í úrskurði ráðuneytisins var talið, með vísan til meðalhófsreglu, að aldur annars málsins leiddi til þess að ekki yrði byggt á því við ákvörðun um áminningu, en um var að ræða vanrækslu á að færa sjúkraskrá árið 2002. Þá var það mat ráðuneytisins að atvik í hinu málinu næðu ein og sér ekki þeim alvarleikaþröskuldi að rétt væri að áminna kæranda vegna þeirra. Var ákvörðun embættis landlæknis því felld úr gildi og lagt fyrir embættið að beina tilmælum til kæranda um úrbætur.

10. okt. 2023Heilbrigðisráðuneytið, Líf og heilsa

Starfshópur skipaður um framtíð læknisþjónustu á Íslandi

Willum Þór Þórsson heilbrigðisráðherra hefur skipað starfshóp til að kortleggja núverandi þörf fyrir læknisþjónustu og þróun hennar til framtíðar. Hópnum er ætlað að skilgreina forsendur fyrir gerð mönnunarviðmiða og mannaflaspá. Honum er líka ætlað að leggja til aðgerðir til næstu ára með mönnun, gæði og öryggi læknisþjónustu að leiðarljósi. Formaður starfshópsins er Ólafur Baldursson læknir.

03. okt. 2023Heilbrigðisráðuneytið, Félags- og fjölskyldumál, Líf og heilsa, Félags- og húsnæðismálaráðuneytið

Tímamótasamningur um starfsendurhæfingu ungs fólks

Undirritaður hefur verið þríhliða samningur milli Sjúkratrygginga Íslands, VIRK starfsendurhæfingarsjóðs og Janusar endurhæfingar ehf. um samþætta og þverfaglega heilbrigðis- og starfsendurhæfingarþjónustu við ungt fólk á aldrinum 18 til 30 ára með flókinn og fjölþættan vanda. Samningurinn tryggir þjónustu fyrir 80 einstaklinga sem falla undir skilgreiningu NEET, þ.e. sem eru ekki í vinnu, virkni eða námi og þurfa sérhæfða einstaklingsmiðaða þjónustu til að efla virkni og starfsgetu. Gert er ráð fyrir að árlegt fjármagn til þjónustunnar nemi um 330 milljónum króna.

03. okt. 2023Heilbrigðisráðuneytið, Líf og heilsa

Börnum óháð kyni býðst nú bólusetning gegn HPV veirunni

Börnum í 7. bekk er nú öllum boðin bólusetning gegn HPV veirunni, óháð kyni. Samhliða hefur verið tekið í notkun nýtt og breiðvirkara bóluefni en áður sem veitir víðtækari vörn gegn krabbameinum af völdum veirunnar. Willum Þór Þórsson heilbrigðisráðherra kynnti áform sín þessa efnis í lok síðasta árs. Hann fól sóttvarnalækni að hefja undirbúning og nú er þessi breyting orðin að veruleika.

29. sep. 2023Heilbrigðisráðuneytið, Líf og heilsa

Geðráð, samráðsvettvangur um geðheilbrigðismál sett á fót

Willum Þór Þórsson heilbrigðisráðherra hefur skipað Geðráð í samræmi við aðgerðaáætlun í geðheilbrigðismálum til ársins 2027. Í Geðráði eiga sæti fulltrúar stjórnvalda, notenda geðheilbrigðisþjónustu, aðstandenda og fagfólks sem fjalla um málaflokkinn. Með þessu er tryggð aðkoma helstu haghafa að stefnumótun, umbótum og þróun á sviði geðheilbrigðismála og geðheilbrigðisþjónustu. Formaður ráðsins er Páll Matthíasson.

29. sep. 2023Heilbrigðisráðuneytið, Líf og heilsa

Heilbrigðisþing 2023 helgað stafrænni þróun - haldið í Hörpu 14. nóvember

Heilbrigðisþing árið 2023 verður með sterkri norrænni skírskotun vegna formennsku Íslands í Norrænu ráðherranefndinni þetta árið. Þingið verður helgað stafrænni þróun innan heilbrigðiskerfisins með áherslu á gögn og gervigreind en Norðurlöndin í heild sinni stefna á að vera í fararbroddi þegar að þessu mikilvæga viðfangsefni kemur. Fyrirlestrar á ráðstefnunni fara fram á ensku en yfirskrift hennar er “Data and Digitalization: Crafting the Future of Sustainable Healthcare”.

29. sep. 2023Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 20/2023

Kærð var ákvörðun Lyfjastofnunar um stöðvun á sölu og innköllun á svonefndu sleipiefni, en stofnunin taldi vöruna lækningatæki. Þar sem varan væri hins vegar framleidd sem snyrtivara uppfyllti hún ekki þær kröfur sem gerðar séu til lækningatækja samkvæmt lögum. Í úrskurði ráðuneytisins var fallist á með Lyfjastofnun að umrædd vara teldist lækningatæki. Þótt ekkert lægi fyrir um að varan væri skaðleg notendum var ákvörðun stofnunarinnar staðfest.

29. sep. 2023Heilbrigðisráðuneytið, Líf og heilsa

Viðhorf íbúa landsbyggðarinnar til bráðaþjónustu í heimabyggð

Heilbrigðisráðuneytið birtir niðurstöður könnunar sem Gallup gerði fyrir ráðuneytið á viðhorfum fólks á landsbyggðinni til bráðaþjónustu í heimabyggð. Könnunin veitir m.a. innsýn í ólík viðhorf og væntingar fólks til þjónustunnar s.s. eftir búsetu, aldri, reynslu af bráðaþjónustu í heimabyggð og ýmsum fleiri þáttum. Niðurstöðurnar veita vísbendingar um styrkleika bráðaþjónustu í landinu og hvaða þætti hennar þarf helst að efla á hverju svæði. Þær geta því nýst við stefnumótun og þróun bráðaþjónustu í landinu.

25. sep. 2023Heilbrigðisráðuneytið, Líf og heilsa

Fjarheilbrigðisþjónusta sem gæti gjörbylt geðheilbrigðisþjónustu fyrir börn

Nýtt meðferðarúrræði á netinu gæti tryggt mun fleiri börnum og forráðamönnum þeirra um allt land árangursríka geðheilbrigðisþjónustu. Háskólinn í Reykjavík og Heilsugæsla höfuðborgarsvæðisins vinna saman að verkefninu sem heilbrigðisráðuneytið hefur styrkt með 70 milljóna króna framlagi. Verkefnið byggist á hugrænni atferlismeðferð (HAM) þar sem foreldrum barna með kvíðaröskun eru kenndar aðferðir til að hjálpa börnum sínum að ná tökum á kvíða. Meðferðin er lágþröskuldaþjónusta sem krefst ekki sjúkdómsgreiningar til þess að tryggja tímanlega þjónustu, svokallaða snemmtæka íhlutun.

25. sep. 2023Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 19/2023

Kærandi kærði ákvörðun embættis landlæknis um að staðfesta ekki tilkynningu hans um rekstur heilbrigðisþjónustu. Umsóknin varðaði útgáfu læknisvottorða og álitsgerða en í málinu var deilt um hvort þjónustan félli undir hugtakið heilbrigðisþjónusta eins og það er skilgreint í lögum um landlækni og lýðheilsu. Í ljósi þeirra upplýsinga sem kærandi veitti um reksturinn á kærustigi var það mat ráðuneytisins að embætti landlæknis þyrfti að leggja nýtt mat á tilkynninguna, enda kynni starfsemin að einhverju leyti að fela í sér veitingu heilbrigðisþjónustu. Var ákvörðunin því felld úr gildi og lagt fyrir embættið að taka málið til meðferðar á ný.

18. sep. 2023Heilbrigðisráðuneytið, Líf og heilsa, Norrænt samstarf

Minnt á ráðstefnuna um áfengi og lýðheilsu þriðjudaginn 19. september

Enn eru nokkur sæti laus á norrænu ráðstefnuna „Alcohol and Public Health in the Nordics“ sem fram fer á Grand hótel Reykjavík á morgun. Fyrirlesarar koma víða að og búa að víðtækri þekkingu og reynslu á sviði rannsókna og stefnumótunar á sviði áfengismála og forvarna. Þeir sem ekki komast geta fylgst með ráðstefnunni í beinu streymi. Ráðstefnan hefst kl. 8.45 með ávarpi Willum Þórs Þórssonara heilbrigðisráðherra.

15. sep. 2023Heilbrigðisráðuneytið, Líf og heilsa

Lyf án skaða - málþing 5. október

Landspítali stendur fyrir málþingi um skynsamlega endurskoðun lyfjameðferðar fimmtudaginn 5. október næstkomandi. Málþingið er liður í alþjóðlega gæðaátakinu; Lyf án skaða sem hófst hér á landi árið 2020. Á málþinginu verður sjónum beint að vaxandi tíðni fjöllyfjameðferðar og mikilvægi þess að móta sameiginlega sýn og verklag um góðar venjur við ávísanir lyfja til að sporna við þessari þróun. Aðalfyrirlesari er Dr. Emily G McDonald sem er þekkt fyrir rannsóknir sínar á nýjum leiðum til að auka gæði lyfjameðferðar og hefur birt yfir 100 vísindagreinar um gæði í heilbrigðisþjónustu.

13. sep. 2023Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 17/2023

Kærandi kærði ákvörðun embættis landlæknis um að synja beiðni um endurupptöku á áliti embættisins á kvörtun kæranda vegna þjónustu tveggja tannlækna. Í úrskurði ráðuneytisins var vísað til þess álit embættis landlæknis væru ekki stjórnvaldsákvarðanir og giltu óskráðar meginreglur stjórnsýsluréttar um endurupptöku og eftir atvikum afturköllun. Við meðferð málsins komu fram upplýsingar sem leiddu til þess að ráðuneytið taldi óháðan sérfræðing, sem hafði veitt umsögn um kvörtun kæranda, hafa verið vanhæfan til að veita umsögnina. Að því virtu taldi ráðuneytið að beita bæri óskráðum meginreglum um afturköllun vegna ógildingarannmarka og að ógilda bæri málsmeðferð embættisins í málinu. Var lagt fyrir embættið að taka málið til meðferðar á ný.

31. ágú. 2023Heilbrigðisráðuneytið, Líf og heilsa

Styrkfjárhæðir vegna almennra tannréttinga nær þrefaldast

Willum Þór Þórsson heilbrigðisráðherra hefur, með breytingu á reglugerð um þátttöku Sjúkratrygginga í kostnaði við tannlækningar, nær þrefaldað styrki til almennra tannréttinga. Hækkunin tekur gildi 1. september næstkomandi. Styrkir til tannréttinga eru tvískiptir. Styrkur til meðferðar í bæði efri og neðri góm hækkar úr 150.000 kr. Í 430.000 kr og styrkur vegna tannréttinga sem krefjast einungis meðferðar í efri eða neðri gómi hækkar úr 100.000 kr. í 290.000 kr.

28. ágú. 2023Heilbrigðisráðuneytið, Líf og heilsa

Til umsagnar: Frumvarp til breytinga á lögum um vísindarannsóknir á heilbrigðissviði

Birt hefur verið til umsagnar frumvarp til breytinga á 13. gr. laga um vísindarannsóknir á heilbrigðissviði. Markmið frumvarpsins er að einfalda og stytta málsmeðferð umsókna um tilteknar vísindarannsóknir, m.a. með því að skilgreina hvers konar umsóknir vísindasiðanefnd og siðanefndum heilbrigðisrannsókna er skylt að senda til umfjöllunar hjá Persónuvernd. Efni frumvarpsins er byggt á sameiginlegum tillögum vísindasiðanefndar og Persónuverndar þessa efnis. Umsagnarfrestur er til 20. september næstkomandi.