Efnisorð
Tegund

Leita eftir efnisorðum

Sýnir 651–700 af 2063
Raða eftir:
21. des. 2021Heilbrigðisráðuneytið, Covid-19, Líf og heilsa

COVID-19: Undanþágur frá sóttvarnaráðstöfunum fyrir þjóðhagslega mikilvæg fyrirtæki halda gildi

Heilbrigðisráðherra veitti síðastliðið vor undanþágur frá reglum um sóttvarnaaðgerðir fyrir þjóðhagslega mikilvæg fyrirtæki svo unnt væri að halda starfsemi þeirra órofinni. Ráðherra hefur ákveðið að áður veittar undanþágur haldi gildi sínu þannig að hertar sóttvarnaráðstafanir raski ekki umræddri starfsemi. Sömu skilyrði fyrir undanþágum gilda og áður, en þær voru veittar að undangengnu samráði við sóttvarnalækni, almannavarnadeild ríkislögreglustjóra og Matvælastofnun.

21. des. 2021Heilbrigðisráðuneytið, Covid-19, Líf og heilsa

COVID-19: Innanlandstakmarkanir hertar til að sporna við hraðri útbreiðslu smita

Almennar fjöldatakmarkanir verða 20 manns og nándarregla 2 metrar í stað 1 með ákveðnum undantekningum. Veitinga- og skemmtistöðum, krám og öðrum stöðum með vínveitingaleyfi ber að loka kl. 21 á kvöldin. Sund- og baðstöðum, líkamsræktarstöðvum og skíðasvæðum verður heimilt að taka á móti 50% af hámarksfjölda. Hraðprófsviðburðir verða takmarkaðir við 200 manns. Hvatt verður til fjarvinnu á vinnustöðum eins og kostur er. Þetta er megininntak hertra innanlandstakmarkana sem heilbrigðisráðherra hefur ákveðið í samræmi við tillögur sóttvarnalæknis til að sporna við hraðri útbreiðslu Covid-smita. Reglugerð þessa efnis tekur gildi fimmtudaginn 23. desember og gildir í þrjár vikur.

16. des. 2021Heilbrigðisráðuneytið, Líf og heilsa

Undirritun samnings um þjónustutengda fjármögnun Sjúkrahússins á Akureyri

Klínísk starfsemi Sjúkrahússins á Akureyri verður frá 1. janúar næstkomandi fjármögnuð í samræmi við umfang veittrar þjónustu þar sem byggt er á DRG; alþjóðlegu flokkunarkerfi sjúkdóma. Hildigunnur Svavarsdóttir forstjóri sjúkrahússins á Akureyri og María Heimisdóttir forstjóri Sjúkratrygginga Íslands undirrituðu samninginn á Akureyri í gær. ​„Þetta er sambærilegur samningur og gerður var um fjármögnun Landspítala í haust og er byltingarkennd breyting á þeirri aðferðafræði sem beitt verður við fjármögnun þessarar mikilvægu heilbrigðisþjónustu.…

14. des. 2021Heilbrigðisráðuneytið, Líf og heilsa

Mælt fyrir frumvarpi að heildstæðri löggjöf um dýralyf

Willum Þór Þórsson heilbrigðisráðherra mælti á Alþingi í dag fyrir frumvarpi um heildarlöggjöf um dýralyf. Frumvarpið felur í sér innleiðingu á reglugerðum Evrópusambandsins í íslenskan rétt í kjölfar heildarendurskoðunar sambandsins á löggjöf um dýralyf. Markmið frumvarpsins er að tryggja gæði og öryggi dýralyfja með öryggi og velferð dýra að leiðarljósi. Þar er ekki síst horft til þess að tryggja yfirsýn yfir skráningu, sölu og notkun sýkingalyfja sem notuð eru fyrir dýr í því skyni að halda aftur af útbreiðslu sýklalyfjaónæmis.

14. des. 2021Líf og heilsa, Heilbrigðisráðuneytið

Skilyrði um tveggja ára starfsreynslu talmeinafræðinga afnumið

Willum Þór Þórsson heilbrigðisráðherra hefur ákveðið að fela Sjúkratryggingum Íslands að fella brott ákvæði úr rammasamningi Sjúkratrygginga Íslands (SÍ) og sjálfstætt starfandi talmeinafræðinga um tveggja ára starfsreynslu sem skilyrði fyrir greiðsluþátttöku sjúkratrygginga. Starfshópur vinnur nú að greiningu á þjónustu talmeinafræðinga og hvernig henni verði best hagað til framtíðar með hliðsjón af lögum um samþættingu þjónustu í þágu farsældar barna. Ný heildstæð samningsmarkmið um þessa þjónustu verða byggð á vinnu starfshópsins og er stefnt að því að SÍ og talmeinafræðingar geti hafið viðræður um nýjan samning á grundvelli þeirra eftir áramót.

07. des. 2021Heilbrigðisráðuneytið, Covid-19, Líf og heilsa

COVID-19: Hjúkrunardeild fyrir covid-sjúklinga opnuð tímabundið á Eir

Í dag verður opnuð á hjúkrunarheimilinu Eir sérstök hjúkrunareining fyrir covid-sjúklinga. Deildin er einkum hugsuð sem sérstakt úrræði fyrir íbúa á hjúkrunarheimilum sem veikjast af völdum Covid-19 og þurfa á sólarhringsumönnun að halda og einnig aldraða sem geta ekki haldið einangrun heima og þurfa umönnun. Hjúkrunardeildin er í húsnæði þar sem Eir hefur rekið dagdvöl fyrir 24 aldraða. Til að gera þetta mögulegt var dagdvölinni fundið annað húsnæði við Höfðabakka 9. Willum Þór Þórsson heilbrigðisráðherra kynnti sér aðstæður í nýju húsnæði dagdvalarinnar fyrir helgi og ræddi við starfsfólk og stjórnendur.

03. des. 2021Heilbrigðisráðuneytið, Covid-19, Líf og heilsa

Landspítali fær fjármagn til að útvista tilteknum aðgerðum og stytta þannig biðlista

Willum Þór Þórsson heilbrigðisráðherra hefur ákveðið að veita Landspítala 60 milljónir króna sem gerir spítalanum kleift að útvista vel á annað hundrað valdra aðgerða og stytta með því biðlista. Um er að ræða tiltölulega einfaldar aðgerðir sem ekki er líklegt að kalli á innlögn á sjúkrahús eða gjörgæsluþjónustu.

03. des. 2021Heilbrigðisráðuneytið, Covid-19, Líf og heilsa

Kaup á nýju lyfi gegn alvarlegum veikindum af völdum Covid-19

Heilbrigðisyfirvöld hafa ákveðið kaup á nýju lyfi sem heitir Sotrovimab frá GlaxoSmithKline og þykir gefa góða raun til að draga úr hættu á alvarlegum veikindum fólks vegna Covid-19 við vissar aðstæður. Lyfið er svokallað einstofna mótefni. Meðferð með einstofna mótefnum gagnast best þeim sem eru óbólusettir og/eða þeim sem mynda illa mótefni vegna lyfja eða sjúkdóma og er notkunin bundin við upphaf veikinda hjá þeim sem eru í aukinni hættu á að þróa með sér alvarlegan sjúkdóm. Til að byrja með hefur verið ákveðið að kaupa 72 skammta af lyfinu sem svokallað undanþágulyf og er það væntanlegt er til landsins síðar í þessum mánuði.

02. des. 2021Heilbrigðisráðuneytið, Covid-19, Líf og heilsa

COVID-19: Ný tölfræði um gagnsemi bólusetningar

Birtar hafa verið á vefnum Covid.is nýjar tölfræðiupplýsingar sem sýna annars vegar samanburð á fjórtán daga nýgengi smita eftir aldurshópum og bóluefnastöðu og hins vegar nýgengi innlagna á sjúkrahús eftir stöðu bólusetningar. Samkvæmt tölfræðinni er nýgengi sjúkrahússinnlagna nú 0,5 hjá fullorðnum sem hafa fengið örvunarbólusetningu, það er um tólf sinnum hærra (5,9) hjá þeim sem eru fullbólusettir og 68 sinnum hærra (34,0) hjá þeim sem ekki eru fullbólusettir en hjá þeim sem fengið hafa örvunarbólusetningu.

01. des. 2021Heilbrigðisráðuneytið, Covid-19, Líf og heilsa

COVID-19: Hraðpróf fyrir viðburði og aðgengi að þeim

Til að koma betur til móts við fólk sem vill sækja viðburði hefur Heilsugæsla höfuðborgarsvæðisins lengt opnunartíma fyrir hraðpróf til kl. 17.00 á laugardögum. Miðvikudaga, fimmtudaga og föstudaga er opið frá kl. 8.00-20.00 en skemur aðra daga. Heilbrigðisstofnanir um allt land bjóða upp á hraðpróf vegna Covid-19. Auk þess veita einkaaðilar þessa þjónustu í Reykjanesbæ, á Akureyri og á fjórum stöðum í Reykjavík. Hér fylgja nánari upplýsingar um hraðprófsstaði og skráningu í hraðpróf.

29. nóv. 2021Heilbrigðisráðuneytið, Líf og heilsa

Willum Þór Þórsson tekinn við heilbrigðisráðuneytinu af Svandísi Svavarsdóttur

Ráðherraskipti urðu í heilbrigðisráðuneytinu í morgun þegar Willum Þór Þórsson tók við embætti heilbrigðisráðherra af Svandísi Svavarsdóttur. Willum segir það mikla áskorun að taka við þeim stóru og mikilvægu verkefnum sem heyra undir ráðuneytið. Hann muni leggja sig allan fram í þeirri vinnu sem framundan er og taki stoltur við keflinu af Svandísi.

26. nóv. 2021Heilbrigðisráðuneytið, Líf og heilsa, Landsráð

Tillögur frá landsráði um endurskoðun verkaskiptingar heilbrigðisstétta o.fl.

Landsráð um mönnun og menntun í heilbrigðisþjónustu hefur skilað Svandísi Svavarsdóttur heilbrigðisráðherra tillögum sem lúta að endurskoðun verkaskiptingar heilbrigðisstétta. Tillögurnar fela í sér aðgerðir sem miða að því að gera ólíkum heilbrigðisstéttum kleift að nýta sérhæfni sína sem best við dagleg störf, færa minna sérhæfðu starfsfólki aukin verkefni og gera þannig heilbrigðisstarfsfólki kleift að verja sem mestum hluta vinnutíma síns við hámark sinnar hæfni. Ráðherra hefur samþykkt tillögur landsráðs. Landsráð skiptir verkefnunum sem hafa þetta að markmiði í úrlausnarefni sem ráðist verði í innan sex mánaða annars vegar og innan tveggja ára hins vegar.…

24. nóv. 2021Heilbrigðisráðuneytið, Líf og heilsa

Niðurstöður vinnustofu um rétta geðheilbrigðisþjónustu á réttum stað

Heilbrigðisráðherra fól forstjóra Landspítala síðastliðið vor að halda vinnustofu um þjónustuferla undir formerkjunum „rétt geðheilbrigðisþjónusta á réttum stað“ með fulltrúum notenda og fulltrúum allra þjónustuveitenda geðheilbrigðisþjónustu í landinu. Markmiðið var að móta tillögur um bætt þjónustuferli sem mætir þörfum notenda og fjölskyldna þeirra. Meðfylgjandi er skýrsla með niðurstöðum vinnustofunnar og tillögum til ráðherra. Niðurstöðurnar verða nýttar inn í stefnumótun um framtíðarsýn í geðheilbrigðismálum til ársins 2030.

23. nóv. 2021Heilbrigðisráðuneytið, Líf og heilsa

Sjúkrahúsið á Akureyri fær 290 milljónir króna til tækjakaupa

Svandís Svavarsdóttir heilbrigðisráðherra hefur ákveðið að úthluta Sjúkrahúsinu á Akureyri 290 milljónum króna af safnliðum fjárlaga til kaupa á tveimur sneiðmyndatækjum. Stærstum hluta fjárins verður varið til kaupa á öflugu tæki sem kostar um 250 milljónir króna. Sjúkrahúsið hefur nú aðeins yfir einu sneiðmyndatæki að ræða sem er orðið 14 ára gamalt og farið að valda vandræðum vegna tíðra bilana. Hildigunnur Svavarsdóttir, forstjóri Sjúkrahússins á Akureyri, segir að þessi nýi tækjakostur muni skipta sköpum fyrir sjúkrahúsið og öryggi sjúklinga á þjónustusvæði þess. Þetta séu mikilvægustu greiningartækin þegar um bráð veikindi er að ræða eða þegar slys ber að höndum. Greiningarhæfnin muni stóraukast og unnt verði að tryggja meiri áreiðanleika og samfellu í þjónustu við sjúklinga.…

17. nóv. 2021Heilbrigðisráðuneytið, Líf og heilsa

Leiðrétting á ítrekuðum rangfærslum um hjúkrunarrými

Ítrekað hefur komið fram í umræðum og yfirlýsingum fólks um fjölgun hjúkrunarrýma að heilbrigðisráðuneytið hafi afþakkað liðsinni aðila sem boðið hafi fram hjúkrunarrými, bæði húsnæði og rekstur, af því að ráðuneytinu hafi ekki hugnast rekstrarform á hendi einkaaðila. Þetta er í öllum atriðum rangt. Síðast í gær komu í Kastljósi fram staðhæfingar um þetta þar sem skilja mátti að á þriðja hundrað hjúkrunarrýma væru tilbúin til rekstrar hjá einkaaðilum ef ráðuneytið væri reiðubúið að semja við þá. Fullyrt var að Hrafnistuheimilin væru tilbúin að taka við á annað hundrað öldruðum „í umönnun og búsetu“ og einnig að fyrir einu og hálfu ári hefðu verið boðin fram hjúkrunarrými fyrir 130 einstaklinga í Urðarhvarfi í Kópavogi. Hvoru tveggja er rangt.

12. nóv. 2021Heilbrigðisráðuneytið, Covid-19, Líf og heilsa

COVID-19: Undanþágur frá sóttvarnaráðstöfunum fyrir þjóðhagslega mikilvæg fyrirtæki

Heilbrigðisráðherra veitti síðastliðið vor undanþágur frá reglum um sóttvarnaaðgerðir fyrir þjóðhagslega mikilvæg fyrirtæki svo unnt væri að halda starfsemi þeirra órofinni. Heilbrigðisráðherra hefur ákveðið að áður veittar undanþágur haldi gildi sínu þannig að hertar sóttvarnaráðstafanir raski ekki umræddri starfsemi. Sömu skilyrði fyrir undanþágum gilda og áður, en þær voru veittar að undangengnu samráði við sóttvarnalækni, almannavarnadeild ríkislögreglustjóra og Matvælastofnun.

12. nóv. 2021Heilbrigðisráðuneytið, Covid-19, Líf og heilsa

COVID-19: Hertar aðgerðir, 50 manna fjöldatakmarkanir – stórátak í örvunarbólusetningum

Heilbrigðisráðherra hefur í samræmi við tillögur sóttvarnalæknis ákveðið að herða til muna sóttvarnaaðgerðir til að sporna við hraðri útbreiðslu Covid-19. Aðgerðirnar taka gildi á miðnætti. Almennar fjöldatakmarkanir verða 50 manns en með notkun hraðprófa verður heimilt að efna til viðburða með að hámarki 500 manns í sóttvarnahólfi. Opnunartími veitingastaða verður styttur um klukkustund. Hámarksfjöldi gesta á sund- og baðstöðum, líkamsræktarstöðvum og skíðasvæðum miðast við 75% af heimiluðum hámarksfjölda samkvæmt starfsleyfi. Reglugerð um þessar aðgerðir gildir til og með 8. desember.

12. nóv. 2021Atvinnuvegir, Vísindi nýsköpun og rannsóknir, Nýsköpun, Félags- og fjölskyldumál, Húsnæðis- og mannvirkjamál, Líf og heilsa, Umhverfi og náttúruvernd, Félags- og húsnæðismálaráðuneytið, Menningar-٫ nýsköpunar- og háskólaráðuneytið

Mikilvægur hvati fyrir nýsköpun og þróun í mannvirkjagerð

Stofnaður hefur verið nýr sjóður til að efla rannsóknir og nýsköpun í mannvirkjagerð á Íslandi. Opnað var fyrir umsóknir í fyrsta sinn í vikunni og hægt er að sækja um styrki fyrir rannsóknar- eða þróunarverkefni á sviði mannvirkjamála. Sjóðurinn, sem hefur fengið nafnið Askur, er fjármagnaður sameiginlega af atvinnuvega- og nýsköpunarráðuneytinu og félagsmálaráðuneytinu en Húsnæðis- og mannvirkjastofnun (HMS) annast stjórn og daglega umsýslu sjóðsins.

09. nóv. 2021Heilbrigðisráðuneytið, Líf og heilsa

Skilyrði um 12 mánaða starfsnám sálfræðinga fyrir útgáfu starfsleyfis frestað

Heilbrigðisráðherra hefur ákveðið að fresta til 1. júlí 2023 gildistöku reglugerðarákvæðis sem kveður á um að 12 mánaða verkleg þjálfun að loknu framhaldsnámi sálfræðinga (cand.spych) sé skilyrði fyrir útgáfu starfsleyfis. Frestunin gildir einnig um sálfræðinga sem útskrifast hafa frá 1. júlí sl. Landsráði um mönnun og menntun í heilbrigðisþjónustu verður falið að gera tillögu til heilbrigðisráðherra, eigi síðar en næsta vor, um fyrirkomulag verklegrar þjálfunar. Tíminn fram að gildistöku ákvæðisins í júlí 2023 verði nýttur til að skipuleggja og koma á fót verklegri þjálfun í samræmi við tillögur landsráðs.

05. nóv. 2021Heilbrigðisráðuneytið, Covid-19, Líf og heilsa

COVID-19: Brýn þörf fyrir fleira fólk í bakvarðasveit heilbrigðisþjónustunnar

Vegna örrar fjölgunar Covid-19 smita með auknu álagi á heilbrigðiskerfið bráðvantar fleira heilbrigðisstarfsfólk á skrá í bakvarðasveit heilbrigðisþjónustunnar. Óskað er eftir liðsinni heilbrigðisstarfsfólks sem er reiðubúið að koma tímabundið til starfa með skömmum fyrirvara, hvort sem er í fullt starf, hlutastarf eða tímavinnu, eftir því sem aðstæður leyfa.

05. nóv. 2021Heilbrigðisráðuneytið, Covid-19, Líf og heilsa

COVID-19: Bólusetningarátak; örvunarskammtar og óbólusettir

Um 160.000 manns um land allt verða boðaðir í örvunarbólusetningu fyrir áramót. Á höfuðborgarsvæðinu verður bólusett í Laugardalshöllinni á tímabilinu 15. nóvember til 8. desember á mánudögum, þriðjudögum og miðvikudögum. Örvunarskammtar eru ætlaðir þeim sem þegar eru bólusettir og fengu síðari bóluefnaskammtinn fyrir a.m.k. fimm mánuðum. Fólk verður boðað með strikamerki sem send verða í smáskilaboðum (SMS). Þeir sem áður hafa fengið boð í bólusetningu en ekki þegið hana, eru hvattir til að mæta.

05. nóv. 2021Heilbrigðisráðuneytið, Covid-19, Líf og heilsa

COVID-19: Innanlandsaðgerðir hertar vegna mikillar fjölgunar smita

Skylt verður að bera grímu þegar ekki er unnt að virða 1 metra nálægðarreglu, fjöldatakmarkanir verða 500 manns, veitingastöðum með vínveitingaleyfi verður skylt að loka tveimur tímum fyrr en nú. Með notkun hraðprófa verður heimilt að halda viðburði fyrir allt að 1.500 manns. Heilbrigðisráðherra hefur ákveðið þessar aðgerðir samkvæmt tillögum sóttvarnalæknis sem hefur áhyggjur af mikilli fjölgun smita, auknum veikindum og vaxandi álagi á heilbrigðiskerfið. Reglur um grímunotkun taka gildi á morgun (á miðnætti aðfaranótt 6. nóvember) en aðrar breytingar miðvikudaginn 10. nóvember og gilda í fjórar vikur til þriðjudags 8. desember.

03. nóv. 2021Heilbrigðisráðuneytið, Líf og heilsa, Landsráð

Fjármögnun og framboð á námsstöðum í sér- og framhaldsnámi heilbrigðisstétta

Landsráð um mönnun og menntun í heilbrigðisþjónustu vinnur nú að því að kortleggja hve margar náms- og sérnámsstöður eru fyrir hendi á heilbrigðisstofnunum, greint eftir heilbrigðisstéttum. Heilbrigðisráðuneytið fól landsráði í ágúst sl. að rýna fjármögnun sérnáms á heilbrigðisstofnunum. Í kjölfarið lagði landsráð fram skilgreindar tillögur til heilbrigðisráðherra um leiðir til að tryggja að ávallt liggi fyrir upplýsingar um framboð og mat á þörf fyrir þessar stöður. Heilbrigðisráðherra féllst á tillögur landsráðs sem fela einnig í sér kröfu um að fjármagn til framhaldsnáms og sérnáms í heilbrigðisgreinum verði skilgreint sérstaklega.

02. nóv. 2021Heilbrigðisráðuneytið, Líf og heilsa

Efri árin – upplýsingar um þjónustu á Island.is

Heilbrigðisráðuneytið vekur athygli á margvíslegum upplýsingum, m.a. um heilbrigðisþjónustu og þjónustu við fólk á efri árum á vefnum Island.is. Þar eru aðgengilegar á einum stað upplýsingar um þjónustu ríkis og sveitarfélaga, s.s. um heimaþjónustu, heimahjúkrun, þjónustuíbúðir, félagsmiðstöðvar, hjúkrunarrými og fleira og leiðbeiningar um hvernig sótt er um þjónustu.

28. okt. 2021Heilbrigðisráðuneytið, Covid-19, Líf og heilsa

COVID-19: Sóttkví og einangrun – reglur um styttri tíma

Sóttvarnalæknir hefur lokið endurskoðun á reglum um sóttkví og einangrun vegna Covid-19 og er niðurstaðan sú að stytta megi einangrun smitaðra og sóttkví þeirra sem hafa verið útsettir fyrir Covid, án þess að auka hættu á útbreiðslu veirunnar. Heilbrigðisráðherra hefur gert breytingu á reglugerð nr. 1100/2021 þessa efnis, í samræmi við tillögur sóttvarnalæknis. Að uppfylltum skilyrðum getur tími í einangrun orðið skemmstur sjö dagar. Almenn krafa um dvöl í sóttkví styttist úr sjö dögum í fimm, að því gefnu að henni ljúki með neikvæðri niðurstöðu úr PCR prófi. Ef einstaklingur undirgengst ekki PCR próf til að ljúka sóttkví þarf hann að sæta henni í 14 daga. Reglugerðin tekur gildi frá og með 29. október og taka breyttar reglur einnig til þeirra sem þegar eru í sóttkví eða einangrun.

27. okt. 2021Heilbrigðisráðuneytið, Covid-19, Líf og heilsa

COVID-19: Bakvarðasveit heilbrigðisþjónustu virkjuð – heilbrigðisstarfsfólk óskast á skrá

Vegna fjölgunar COVID-19 smita hefur verið ákveðið að virkja bakvarðasveit heilbrigðisþjónustunnar. Þetta er nauðsynlegt viðbragð til að mæta mönnunarvanda sem skapast getur vegna veikinda eða tímabundinnar sóttkvíar heilbrigðisstarfsfólks ef smit kemur upp á heilbrigðisstofnunum, líkt og gerst hefur á Landspítala þar sem deild 12G er nú í sóttkví. Biðlað er til heilbrigðisstarfsfólks sem hefur tök á að veita tímabundið liðsinni ef á reynir um að skrá sig í bakvarðasveitina. Á Landspítala vantar nú einkum hjúkrunarfræðinga og sjúkraliða.

25. okt. 2021Heilbrigðisráðuneytið, Covid-19, Líf og heilsa

COVID-19: Staða bólusetninga, horfur og næstu skref

Smitum af völdum Covid-19 hér á landi hefur fjölgað nokkuð undanfarið og þróun í ýmsum ríkjum Evrópu þar sem fjölgun smita er enn hraðari og sjúkrahúsinnlögnum fjölgar ört, kallar á stöðumat hér. Vitað er að bólusetning gegn veirunni veitir góða vörn og ver fólk fyrir alvarlegum veikindum. Um 76% landsmanna eru nú fullbólusett en til að fyrirbyggja hraðari útbreiðslu og mikil veikindi hér þarf að gera enn betur. Um 34.400 einstaklingar 12 ára og eldri eru óbólusettir.

21. okt. 2021Líf og heilsa, Vísindi nýsköpun og rannsóknir, Heilbrigðismál, Landbúnaður, Nýsköpun, Sjávarútvegur, Atvinnuvegir, Heilbrigðisráðuneytið, Menningar-٫ nýsköpunar- og háskólaráðuneytið

Sýklalyfjaónæmis- og súnusjóður auglýsir eftir umsóknum

Auglýst er eftir umsóknum um styrki úr Sýklalyfjaónæmis- og súnusjóði. Sjóðurinn starfar í samræmi við þingsályktun nr. 40/149 um aðgerðaáætlun um matvælaöryggi og vernd búfjárstofna, og nýtur framlaga frá heilbrigðisráðuneytinu og atvinnuvega- og nýsköpunarráðuneytinu samtals 30 milljónir kr. á ári í þrjú ár, þ.e. til ársloka 2022.

19. okt. 2021Heilbrigðisráðuneytið, Covid-19, Líf og heilsa

COVID-19: Verulegar afléttingar innanlandstakmarkana strax og að fullu 18. nóvember

Almennar fjöldatakmarkanir verða 2.000 manns, grímuskyldu verður aflétt, opnunartími veitingastaða lengdur um klukkustund og skráningarskyldu gesta aflétt. Regla um nándarmörk verður áfram 1 metri. Þetta er megininntak breytinga á reglugerð um samkomutakmarkanir sem tekur gildi 20. október samkvæmt ákvörðun heilbrigðisráðherra. Stefnt er að fullri afléttingu samkomutakmarkana innanlands frá og með 18. nóvember.

18. okt. 2021Heilbrigðisráðuneytið, Líf og heilsa

Álagi létt af Landspítala – fjölgun legurýma og 30 ný rými á Landakoti

Ný 16 rýma endurhæfingardeild verður opnuð á við Landspítala á Landakoti í byrjun nóvember og í byrjun febrúar fjölgar þeim um 14 til viðbótar. Þá verða níu líknarrými opnuð á Landakoti í lok október. Í ágúst sl. voru opnuð á Reykjalundi 14 endurhæfingarrými sem aðeins eru ætluð sjúklingum frá Landspítala. Í sama mánuði var sjúkrarýmum fjölgað um samtals 20 við heilbrigðisstofnanirnar á Suðurlandi og Suðurnesjum, 10 á hvorum stað með það að markmiði að draga úr álagi á Landspítala. Ráðist hefur verið í mörg önnur verkefni í þessu skyni. Sum þeirra eru þegar komin til framkvæmda en önnur í sjónmáli. Opnun líknarrýma á Landakoti felur í sér breytingu á þjónustu þar sem ekki hafa verið rekin þar líknarrými síðan árið 2011.

18. okt. 2021Heilbrigðisráðuneytið, Líf og heilsa

Framlengdur umsóknarfrestur um embætti forstjóra Landspítala

Heilbrigðisráðherra hefur ákveðið að framlengja umsóknarfrest um embætti forstjóra Landspítala til 8. nóvember næstkomandi. Í upphaflegri auglýsingu um embættið var veittur tveggja vikna lögbundinn lágmarksfrestur en ráðherra hefur nú ákveðið að veita mögulegum umsækjendum rýmri tíma en áskilið er í lögum nr. 70/1996. Ráðherra hefur jafnframt lengt setningartíma Guðlaugar Rakelar Guðjónsdóttur í embætti forstjóra um tvo mánuði, þ.e. til 1. mars næstkomandi.

15. okt. 2021Heilbrigðisráðuneytið, Líf og heilsa

Embætti forstjóra Landspítala laust til umsóknar

Heilbrigðisráðuneytið auglýsir laust til umsóknar embætti forstjóra Landspítala. Landspítali er aðalsjúkrahús landsins og háskólasjúkrahús. Á spítalanum er veitt sérhæfð sjúkrahúsþjónusta, m.a. á göngu- og dagdeildum, fyrir alla landsmenn og almenn sjúkrahúsþjónusta fyrir íbúa heilbrigðisumdæmis höfuðborgarsvæðisins. Á Landspítala starfa á sjötta þúsund starfsmenn og er spítalinn einn stærsti vinnustaður landsins.

08. okt. 2021Heilbrigðisráðuneytið, Líf og heilsa

Alþjóðlegur dagur líknarþjónustu, 9. október 2021

Alþjóðlegur dagur líknarþjónustu er á morgun, 9. október. Tilgangur hans er að vekja athygli á mikilvægi líknarþjónustu og hvers vegna þurfi að tryggja að allir hafi aðgang að henni sama hvar þeir búa, á hvaða aldri þeir eru og hver bakgrunnur þeirra er. Heilbrigðisráðherra staðfesti fyrr á þessu ári aðgerðaáætlun til fimm ára um líknarþjónustu hér á landi sem byggð var á skýrslu tveggja starfshópa og tillögum þeirra um skipulagningu líknar- og lífslokameðferðar um allt land.

05. okt. 2021Heilbrigðisráðuneytið, Líf og heilsa

Forstjóri Landspítala lætur af störfum

Heilbrigðisráðherra hefur orðið við ósk Páls Matthíassonar forstjóra Landspítala um að hann láti af starfi sínu. Páll lætur af embætti frá og með 11. október næstkomandi. Guðlaug Rakel Guðjónsdóttir, framkvæmdastjóri meðferðarsviðs Landspítala, mun að beiðni ráðherra taka við stöðu forstjóra tímabundið til áramóta, þar til skipað hefur verið í embættið að nýju. Páll mun verða nýjum forstjóra innan handar næstu mánuði.

04. okt. 2021Heilbrigðisráðuneytið, Líf og heilsa

Mælaborð með vísum um gæði og umfang heilsugæsluþjónustu á höfuðborgarsvæðinu

Heilbrigðisráðuneytið hefur birt mælaborð sem veitir margvíslegar upplýsingar um gæði og umfang heilsugæsluþjónustu á höfuðborgarsvæðinu. Mælaborðið endurspeglar þá vísa sem lagðir eru til grundvallar í fjármögnunarlíkaninu sem stýrir fjármögnun heilsugæslustöðva. Kerfið byggist á því að fjármagn til hverrar heilsugæslustöðvar endurspegli þann hóp fólks sem stöðin þjónar, umfang og gæði veittrar þjónustu og hversu vel viðkomandi stöð nær tilteknum markmiðum um ýmsa þætti þjónustunnar. Mælaborðið gerir meðal annars kleift að bera saman hvernig einstakar heilsugæslustöðvar á höfuðborgarsvæðinu standa gagnvart þeim vísum sem fjármögnunarlíkanið tekur til.

30. sep. 2021Heilbrigðisráðuneytið, Líf og heilsa

Sýklalyfjanotkun fólks hefur dregist saman um 30% á fjórum árum

Heildarnotkun sýklalyfja í heilbrigðiskerfinu hér á landi hefur dregist saman um 30% á fjórum árum þegar tekið er mið af heildarsölu sýklalyfja hér á landi, mæld í daglegum lyfjaskömmtum á hverja 1.000 íbúa (DID). Heildarsalan var um 24 DID árið 2017 en var komin niður í um 16 DID árið 2020. Notkunin er þó enn töluvert meiri hér en annars staðar á Norðurlöndunum. Þetta er meðal þess sem fram kemur í nýrri ársskýrslu embættis landlæknis um sýklalyfjanotkun árið 2020.

28. sep. 2021Heilbrigðisráðuneytið, Covid-19, Líf og heilsa

COVID-19: Breyttar reglur um takmarkanir á landamærunum 1. október

Felld verður niður krafa um að einstaklingar með tengsl við Ísland þurfi að framvísa vottorði um neikvætt Covid próf við komu til landsins. Farþegar í tengiflugi sem ekki fara út fyrir landamærastöð verða einnig undanþegnir framvísun slíks vottorðs. Sem fyrr þurfa þeir sem eru með tengsl við Ísland að fara í sýnatöku eftir komu til landsins, að undanskildum börnum sem fædd eru 2005 eða síðar. Þetta er meginefni breytinga á takmörkunum á landamærum vegna Covid-19 sem heilbrigðisráðherra hefur ákveðið í samræmi við tillögur sóttvarnalæknis og er gert ráð fyrir að þær gildi til 6. nóvember næstkomandi.