Staðfesti stjórnunar- og verndaráætlun fyrir Hverfjall

Jóhann Páll Jóhannsson, umhverfis-, orku- og loftslagsráðherra, hefur staðfest stjórnunar- og verndaráætlun fyrir náttúruvættið Hverfjall í landi Voga í Mývatnssveit.

Hverfjall er gjóskugígur sem hlóðst upp á skömmum tíma í mjög kröftugu þeytigosi fyrir um 2.500 árum. Gígurinn er með þeim stærstu sem þekkjast á jörðinni og hefur hátt verndargildi. Frá Hverfjalli er sérlega gott útsýni yfir Mývatnssveit og er ganga á fjallið og umhverfis gíginn stutt og gefandi. Hverfjall var friðlýst árið 2011 og var friðlýsingin endurskoðuð í nóvember 2024 og svæðið þá stækkað í samráði við landeigendur.

Jóhann Páll Jóhannsson umhverfis-, orku- og loftslagsráðherra: „Hverfjall er þekkt kennileiti í Mývatnssveit. Formfagur gígur sem býður upp á magnaða náttúruupplifun, enda einn vinsælasti ferðamannastaðurinn við Mývatn. Það er því ánægjulegt að geta staðfest stjórnunar- og verndaráætlunina sem við bindum vonir við að muni stuðla að góðri umgengni og náttúruvernd á staðnum.“

Í stjórnunar- og verndaráætluninni er lögð fram stefnumótum til framtíðar, ásamt aðgerðaáætlun til eins árs. Stjórnunar- og verndaráætlunin var unnin í samstarfi Náttúruverndarstofnunar, landeigenda Voga og Þingeyjarsveitar.

Náttúruvætti er einn flokkur friðlýstra svæða og er markmiðið með friðlýsingu slíkra svæða að vernda einstakar náttúrumyndanir sökum fræðilegs gildis, fegurðar, eða sérkenna.