26. september 2023 /
Dómsmálaráðuneytið

Dómsmálaráðherra heimsækir Austurland

Kristján Ólafur Guðnason yfirlögregluþjónn, Margrét María Sigurðardóttir lögreglustjóri, Guðrún Hafsteinsdóttir dómsmálaráðherra og Karl Axelsson aðstoðaryfirlögregluþjónn.
Kristján Ólafur Guðnason yfirlögregluþjónn, Margrét María Sigurðardóttir lögreglustjóri, Guðrún Hafsteinsdóttir dómsmálaráðherra og Karl Axelsson aðstoðaryfirlögregluþjónn.

Guðrún Hafsteinsdóttir dómsmálaráðherra heimsótti stofnanir á Austurlandi í byrjun september.  

Héraðsdómur Austurlands

Heimsókn ráðherrans á Austurland hófst hjá héraðsdómi Austurlands að Lyngási. Þar tóku á móti ráðherra og fylgdarliði Ólafur Ólafsson dómstjóri og Eydís Eyþórsdóttir. Ráðherra hafði sérstakt orð á því að dómsalur héraðsdóms Austurlands væri einstaklega virðulegur og vistlegur. Eftir að hafa fengið kynningu á starfseminni á Austurlandi spunnust nokkrar umræður um aðbúnað og starf minni héraðsdóma á landsbyggðinni. Nokkuð var rætt um frumvarp dómsmálaráðherra um sameiningu héraðsdómstólanna og urðu samræður lifandi og fróðlegar.

Ólafur Ólafsson dómstjóri í héraðsdómi Austurlands, Guðrún Hafsteinsdóttir og Eydís Eyþórsdóttir dómritari.

Lögreglustjórinn á Austurlandi

Þegar dómstólinn hafði verið kvaddur lá leið ráðherra niður á Eskifjörð þar sem lögreglan á Austurlandi var heimsótt. Margrét María Sigurðardóttir lögreglustjóri á Austurlandi ásamt samstarfsmönnum bauð ráðherra velkominn og farið var í skoðunarferð um stöðina á Eskifirði. Að lokinni skoðun fór lögreglustjóri yfir kynningu á lögreglunni á Austurlandi, umdæminu, starfsfólki og helstu verkefnum sem einkenna landsfjórðunginn.

Umdæmi lögreglustjórans á Austurlandi er um 15.700 ferkílómetrar sem gerir það að næst stærsta umdæmi landsins, einungis Suðurlandsumdæmi er stærra. Á svæðinu eru sex starfsstöðvar; á Eskifirði þar sem er aðalstöð lögreglu og lögreglustjóri hefur aðsetur, Egilsstöðum, Fáskrúðsfirði, í Neskaupstað, á Djúpavogi og Vopnafirði. Rannsóknardeild er á Fáskrúðsfirði sem sinnir öllu starfssvæðinu og eru stærri brot og umfangsmeiri að jafnaði rannsökuð þar. Önnur mál eru að jafnaði til rannsóknar í almennri deild. Verkefni lögreglu eru fjölbreytt á svo stóru starfssvæði með hálendiseftirliti meðal annars og virku eftirliti í tengslum við ferðir Norrænu sem siglir vikulega allt árið til hafnar á Seyðisfirði.

Sérstaða embættisins er dreifð byggð með tólf byggðakjörnum allt frá Djúpavogi í suðri til Vopnafjarðar í norðri. Stærstur þeirra er Egilsstaðir með sína ríflega tvö þúsund og fimm hundruð íbúa, en íbúafjöldi svæðisins er rétt um tíu þúsund. Stór og alvarleg almannavarnarmál hafa verið áberandi á Austurlandi á undanförnum misserum og mjög oft hefur þurft að grípa til rýminga í þéttbýli.

Starfsfólk lögreglunnar á Austurlandi með dómsmálaráðherra.

Sýslumaðurinn á Austurlandi

Heimsókn ráðherra á Austurlandi lauk hjá Lárusi Bjarnasyni sýslumanni Austurlands og starfsfólki hans á Eskifirði. Á skrifstofum sýslumanns fékk ráðherra kynningu á verkefnum sýslumanns á Austurlandi. Ráðherra flutti starfsfólki þær fréttir að ekki yrði lagt fram frumvarp um sameiningu sýslumannsembætta eins og tilkynnt hafði verið fyrr á árinu. Tíminn yrði notaður til aukins samráðs og starfsmenn og sýslumenn fengju tækifæri til að sýna fram á hverju mætti áorka með öflugu samstarfi þvert á embætti og aukinni stafrænni þjónustu.

 

Birna Kristín Einarsdóttir, Guðrún Hafsteinsdóttir dómsmálaráðherra, Lárus Bjarnason sýslumaður á Austurlandi og Íris Árnadóttir.

Var efnið hjálplegt?