Athugið: Þessi frétt er meira en 5 ára gömul.
5. apríl 2019 /
Utanríkisráðuneytið

Guðlaugur Þór fundaði með utanríkisráðherra Póllands

Jacek Czaputowicz, utanríkisráðherra Póllands, og Guðlaugur Þór Þórðarson utanríkisráðherra
Utanríkisráðuneytið
Jacek Czaputowicz, utanríkisráðherra Póllands, og Guðlaugur Þór Þórðarson utanríkisráðherra

Tvíhliða samskipti, málefni norðurslóða og alþjóðamál voru efst á baugi á fundi Guðlaugs Þórs Þórðarsonar utanríkisráðherra og Jacek Czaputowicz, utanríkisráðherra Póllands, sem fram fór á Kolabrautinni í Hörpu í hádeginu í dag.

Náin og góð samskipti eru á milli Íslands og Póllands, viðskiptin á milli landanna eru blómleg og greiðar flugsamgöngur frá pólskum borgum hingað til lands. Þá eru um sautján þúsund Pólverjar búsettir hér á landi. Í heimsókn sinni hittir Czaputowicz meðal annars landa sína sem búa á Íslandi. 

„Framlag Pólverja til íslensks samfélags er bæði mikið og margþætt. Pólverjar sem hér búa og starfa hafa átt ríkan þátt í efnahagsuppgangi undanfarinna ára og á erfiðum tímum eftir hrun sýndu pólsk stjórnvöld Íslandi mikið vinarþel með lánafyrirgreiðslu þegar aðrir synjuðu okkur um slíkt. Það er mér því mikið ánægjuefni að taka á móti pólska ráðherranum og ræða við hann um það góða samband sem er á milli Íslands og Póllands. Ég er viss um að við getum þróað það enn frekar og fært inn á fleiri spennandi brautir“ segir Guðlaugur Þór Þórðarson. 

 Auk þess að ræða tvíhliða samskipti ríkjanna, þar sem seinkun á afhendingu nýs Herjólfs bar meðal annars á góma, voru einnig til umræðu málefni norðurslóða og formennska Íslands í Norðurskautsráðinu, sem hefst í næsta mánuði. Pólland hefur átt áheyrnaraðild að ráðinu frá stofnun þess árið 1996. Síðastliðin ár hefur Pólland lagt ríkari áherslu á málefni norðurslóða og mótað sérstaka norðurslóðastefnu í því skyni. Þá ræddu ráðherrarnir starf Eystrasaltsráðsins ásamt yfirstandandi formennsku Íslands í norrænu ráðherranefndinni.

Útganga Bretlands úr Evrópusambandinu, málefni EES-samningsins og önnur mikilvæg viðfangsefni á alþjóðavettvangi voru einnig til umræðu á fundi ráðherranna. Þá ræddu þeir um öryggis- og varnarmál og samstarfið í Atlantshafsbandalaginu en ráðherrarnir sóttu báðir utanríkisráðherrafund Atlantshafsbandalagsins sem haldinn var í Washington í gær. Loks voru mannréttindi til umræðu og málefni mannréttindaráðs Sameinuðu þjóðanna en þar á Ísland sæti.

Heimsókn Czaputowicz hér á landi lýkur á morgun. 


 
Var efnið hjálplegt?