Athugið: Þessi frétt er meira en 5 ára gömul.
1. nóvember 2019 /
Innviðaráðuneytið

Netöryggiskeppni íslenskra ungmenna hafin

Netöryggiskeppni íslenskra ungmenna, Nían, stendur yfir til og með 15. nóvember en skráning er tli og með 13. nóvember.
Netöryggiskeppni íslenskra ungmenna, Nían, stendur yfir til og með 15. nóvember en skráning er tli og með 13. nóvember.

Netöryggiskeppni íslenskra ungmenna (Níu), sem einnig gengur undir heitinu Nían, hófst í dag en um er að ræða fyrstu keppni sinnar tegundar á Íslandi. Markmið keppninnar er að leita að ungu fólki sem hefur áhuga á netöryggismálum og hvetja það til að vinna við þau í framtíðinni. Í keppninni leysa þátttakendur ýmis verkefni sem snúa að netöryggi, svo sem að framkvæma skarpskyggnipróf og árásir á netþjóna svo fátt eitt sé nefnt.

Keppnin nú er forkeppni fyrir landskeppni sem haldin verður á UT-messunni í febrúar á næsta ári. Keppnin er tvískipt, yngri deild er fyrir aldurshópinn 14-20 ára og eldri deild fyrir 21-25 ára. Miðað er við aldur í lok næsta árs, þar sem landskeppnni getur orðið undanfari þátttöku í evrópsku netöryggiskeppninni „European Cyber Security Challenge“ (ECSC) sem haldin er árlega. Hún var haldin í Búkarest, 9.-11. október sl. og verður næst haldin í Vínarborg, 3.-7. nóvember 2020. Verði Ísland með í þeirri keppni yrði tíu manna hópur valinn úr landskeppninni til að keppa fyrir Íslands hönd.

Keppnin hófst í dag, 1. nóvember 2019, og stendur yfir í tvær vikur eða til loka dags 15. nóvember. Hægt verður að skrá sig til og með 13. nóvember. Hver og einn leysir verkefnin á sínum hraða og sumir ættu jafnvel að geta lokið þeim á tveimur dögum.

Keppnin hérlendis er haldin að frumkvæði samgöngu- og sveitarstjórnarráðuneytisins, en öryggisfyrirtækið Syndis sér um framkvæmd keppninnar í samstarfi við ráðuneytið og fleiri aðila. Margir gefa framlag til keppninnar með ýmsum hætti og ekki hefði verið gerlegt að halda hana án þessa góða stuðnings. 

Nánari upplýsingar má fá á vef keppninnar antisec.is og þar má einnig skrá sig til þátttöku og hefja keppni. Forkeppnin fer öll fram á vefnum, en dómarar velja síðan þátttakendur til þátttöku í landskeppninni sem fer fram á UT-messunni í Hörpu, 7.-8. febrúar 2020.

Var efnið hjálplegt?